Kona framkvæmir World's Greatest Stretch á íslenskum golfvelli sem hluta af hreyfanlegri upphitun fyrir golfhring.

Þarftu virkilega að teygja fyrir golf?

Margir kylfingar teygja áður en þeir fara á fyrsta teig. En er það besta leiðin til að undirbúa líkamann? Svarið er ekki alveg eins einfalt og margir halda.
Það hefur lengi verið talið sjálfsagt að teygja vel áður en farið er út á golfvöll. Margir halda jafnvel stöðugri teygju í 30–60 sekúndur áður en þeir slá fyrsta höggið. Í dag benda rannsóknir hins vegar til þess að það sé yfirleitt betra að hita líkamann upp með hreyfingu heldur en að eyða löngum tíma í kyrrstæðar teygjur áður en spilað er.

Kyrrstæðar teygjur eða hreyfanleg upphitun?

Kyrrstæðar teygjur (static stretching) fela í sér að halda teygju í ákveðinn tíma. Þær geta verið gagnlegar til að bæta liðleika yfir lengri tíma eða eftir æfingar til að ná fram slökunarástandi í líkamanum. Fyrir golfhring er hins vegar oft skynsamlegra að velja hreyfanlega upphitun (dynamic warm-up), þar sem líkaminn er hreyfður í gegnum þær hreyfingar sem golfið krefst.

Af hverju virkar hreyfanleg upphitun betur?

Markmiðið fyrir golfhring er ekki fyrst og fremst að verða liðugri á nokkrum mínútum. Markmiðið er að undirbúa líkamann fyrir hraðar og kraftmiklar hreyfingar.
  • Hækkar líkamshita.
  • Virkjar vöðvana.
  • Bætir samhæfingu.
  • Undirbýr liði og sinar fyrir álag.
  • Getur hjálpað til við að auka sveifluhraða.

Á þá aldrei að teygja?

Jú. Ef þú ert með ákveðna hreyfiskerðingu getur markviss teygja verið hluti af upphituninni. Ef þú ert óviss um hvaða hreyfiskerðingar skipta máli fyrir þína golfsveiflu getur hreyfigreining fyrir golf hjálpað til við að kortleggja hreyfigetu og aðra líkamlega þætti. Fyrir flesta kylfinga ættu kyrrstæðar teygjur þó ekki að vera meginhluti upphitunarinnar rétt áður en spilað er. Þess í stað getur verið gagnlegt að nota hreyfingar sem líkja eftir golfsveiflunni og virkja helstu vöðvahópa.

Einföld 5 mínútna upphitun

  • Hröð ganga í 2 mínútur.
  • World’s Greatest Stretch.
  • Snúningar í brjósthrygg.
  • Fótasveiflur fram og til hliðar.
  • Nokkrar léttar golfsveiflur með tveimur kylfum.
Slík upphitun tekur aðeins nokkrar mínútur en getur hjálpað líkamanum að vera betur undirbúinn fyrir fyrsta teighöggið. Regluleg vinna með styrk og hreyfigetu getur síðan hjálpað til við að byggja upp líkamlegar forsendur fyrir golfið til lengri tíma.
Fyrir flesta kylfinga er betra að undirbúa líkamann með hreyfingu en að standa kyrr og teygja í nokkrar mínútur áður en hringurinn hefst.

📚 Það sem rannsóknir sýna

  • Hreyfanleg upphitun getur bætt líkamlega frammistöðu fyrir íþróttir sem krefjast krafts og hraða.
  • Langar kyrrstæðar teygjur rétt fyrir kraftmikla frammistöðu geta tímabundið dregið úr hámarksafli hjá sumum einstaklingum.
  • Golfarar geta haft gagn af upphitun sem sameinar hreyfanleika, virkjun og æfingasveiflur.
  • Regluleg upphitun getur einnig hjálpað til við að undirbúa vöðva og liði fyrir álag.

Niðurstaða

Þú þarft ekki endilega að sleppa teygjum alveg. En ef markmiðið er að undirbúa líkamann fyrir golfhring er hreyfanleg upphitun yfirleitt betri kostur en langar kyrrstæðar teygjur. Nokkrar markvissar hreyfingar geta skipt meira máli en margir gera sér grein fyrir.

Heimildir

  1. Behm DG, Chaouachi A. A review of the acute effects of static and dynamic stretching on performance. European Journal of Applied Physiology. 2011.
  2. Fradkin AJ, et al. Effects of warming-up on physical performance: a systematic review. Journal of Strength and Conditioning Research. 2010.

Frekara lesefni

Deildu með öðrum kylfingi

ÆFINGAMYNDBAND

Æfingalýsing

Hnébeygjur á kassa

Settu þig rólega niður á kassann með stjórn og haltu góðri spennu í bolnum allan tímann.

Róleg niðurleið

Halda spennu í bol

Varaæfingar

Bikar hnébeygjur

Split hnébeygjur

Hnébeygjur með stöng

SKILABOÐ

Spurning um æfinguna?

Sendu mér skilaboð ef eitthvað er óskýrt eða ef þú vilt feedback á framkvæmdina.